بەهۆى لێچوونى نەوتى رەش و دروستکردنى ئاستەنگى هاتوچۆ دەستبەسەر تانکەرێکدا گیرا و شۆفێرەکەشى دەستگیرکرا.
بەڕێوەبەرایەتیی پۆلیسى دارستان و ژینگەى سلێمانى رایگەیاند، بەهۆی لێچوونی بڕێکى زۆر لە نەوتی رەش و دروستکردنی ئاستەنگ و مەترسی بۆ شۆفێران لەسەر شەقامی سەرەکیی (سەیدسادق- ناڵپارێز) لەلایەن مەفرەزەیەکی بنکەی پۆلیسی دارستان و ژینگەی ناڵپارێز و بە هاوکاریی هێزەکانى ئاسایش شۆفێرێک دەستگیرکرا و دەستیش بەسەر تانکەرەکەیدا گیرا.
ئاماژەى بەوەشدا، زۆرکات بەهۆی پابەندنەبوون و کەمتەرخەمی شۆفێرانی بارهەڵگری سووتەمەنی و لێچوون و رژانی جۆر و بەرهەمەکانی (نەوت) مەترسی بۆ شۆفێران و، رووداوەکانی هاتوچۆ دروست دەبێت.
پۆلیسى دارستان و ژینگەى سلێمانى ئەوەشى خستەڕوو، پەڕاوی لێکۆڵینەوە رێکخراوە بۆ وەرگرتنی رێکاری یاسایی لەلایەن دادوەری لێکۆڵینەوەوە.
