قائیمقامی سلێمانی رایگەیاند، ” بۆ سەلامەتیی کرێکاران زیاتر لە هەزار و 100شوێنمان ئاگادارکردووەتەوە”.
ئاوات محەمەد، قائیمقامی سلێمانی، رایگەیاند، “لە سۆنگەی باوەڕبوونمان بە دادپەروەریی کۆمەڵایەتی، بەردەوامبووین لە پشتیوانیکردن لە خەباتی مەدەنی و پیشەیی کرێکاران و داکۆکیکردن لە مافە رەواکانیان، لەبەرئەوەی چینی كرێكاران لە كوردستاندا، چینێکی سەرەکیی کۆمەڵگە پێکدەهێنن و هەمیشە رۆڵێکی گرنگ و بەرچاویان هەبووە لە گەشە و ئاوەدانکردنەوە و بنیادنانی وڵاتەکەمان”.
وتیشی، “ساڵانێکە قائیمقامیەتی سلێمانی گرنگی بە ژیان و سەلامەتیی کرێکار دەدات و کاری بۆ باشتربوونی هەلومەرجی کرێکاران و ژینگەی کارکردنیان کردووە، لیژنەی سەلامەتیی کرێکاران لە سەرەتای دەستبەکاربوونیەوە لە ساڵی 2018 تاوەکو 1ی ئایاری 2025، توانیویانە هەشت هەزار و 181 سەردان بۆ کارگە، کۆمپانیا و شوێنەگشتییەکان ئەنجامبدەن، هەزار و 104 شوێنیان ئاگادارکردووەتەوە كه پێویسته له شوێنی كاركردنیاندا رەچاوی مهرج و رێنماییهكانی سهلامهتیی كرێكار بکەن”.
قائیمقامی سلێمانی دەڵێت، “لەو ژمارەیە شوێنێک بەهۆی پێشێلکردنی مافەکانی کرێکارەوە رووبەڕووی دادگا کراوەتەوە و حەوت شوێنیش داخراون”.
باس لەوەشدەکات، “ئامانجی سەرەکیی ئێمە ئەوەیە لە رێگەی ئەو لیژنەیەوە ئاستەنگ و مەترسییەکانی بەردەم کرێکاران کەمبکەینەوە، تاوەکو رێگری بکرێت لەو قوربانییە زۆرانەی دەستی کار، کە ساڵانە بەهۆی نەبوونی مەرجەکانی سەلامەتییەوە روودەدەن”.
