وتەبێژی بەڕێوەبەرایەتیی گشتیی حەج و عومرەی هەرێم رایدەگەیەنێت، ناوەڕاستی مانگی داهاتوو یەكەم كاروانی حاجییان بەرەو سعودیە بەرێدەكەون و دەشڵێت، “ئەو كەسانەی بۆ عومرە چوونەتە سعودیە دەبێت تاوەكو 29ی ئەم مانگە بگەڕێنەوە”.
كاروان ستوونی، وتەبێژی بەڕێوەبەرایەتیی گشتیی حەج و عومرەی هەرێم لە لێدوانێكدا بە تۆڕی میدیایی ئێستای راگەیاند، چاوەڕواندەكرێت لە 10 بۆ 15ی مانگی داهاتوو یەكەم كاروانی حاجییان بەرەو سعودیە بەرێبكەون و لەگەڵ دەستەی باڵای حەجی عێراقی لەسەر هێڵين بۆ دیاریكردنی كاتی رۆیشتنی حاجییان بە رێگای وشكانی و ئاسمانی.
وتیشی، “دەبێت تاوەكو 29ی ئەم مانگە ئەو كەسانەی بۆ گەشتی عومرە چوونەتە سعودیە بگەڕێنەوە ئەگەر نا دەستگیردەكرێن و هەر كۆمپانیایەك پابەندی رێنماییەكە نەبێت بە بڕی 35 ملیۆن دیناری عێراقی سزا دەدرێت”.
