بەڕێوەبەرایەتیی هاتوچۆی هەولێر رایدەگەیەنێت، راییکردنی مامەڵە بە بریکارنامە نەوەستاوە و کاریپێدەکرێت.
بەڕێوەبەرایەتییەکە لە روونکردنەوەیەکدا دەڵێت، “ماوەی چەند رۆژێکە دەنگۆیەک بڵاوبووەتەوە گوایە راییکردنی مامەڵە بە بریکارنامە (وکالة) لە بەڕێوەبەرایەتییەکەمان دەوستێت و کاری پێناکرێت، ئەمەش بووەتەهۆی ئەوەی ژمارەیەکی زۆری ئەو هاوڵاتییانەی کڕین و فرۆشتنی ئۆتۆمبێلیان بە بریکارنامە ئەنجامداوە، سەردانمان بکەن و قەرەباڵغییەکی زۆر لە بەشی تۆمار دروستببێت”.
دەشڵێت، هاوڵاتییان دڵنیادەکەینەوە کە راییکردنی مامەڵە بە بریکارنامە لە بەڕێوەبەرایەتییەکەمان نەوەستاوە و بەردەوامیش کاری پێدەکرێت، ئەوەی هەیە تەنها دەنگۆیە.
