بەپێی ئەو زانیارییانەی بە تۆڕی میدیایی ئێستا دراون، وەزارەتی سامانە سروشتییەكانی هەرێم هەوڵدەدات كوالێتیی بەنزینە 800 دینارییەكە بەرزبكاتەوە و بڕیارە سبەینێ لە ئەنجومەنی پارێزگای سلێمانییەوە نووسراوێك بۆ وەزارەتی سامانە سروشتییەكان بەرزبكرێتەوە.
لە زانیارییەكاندا هاتووە، ئێستا ڕۆژانە بڕی یەك ملیۆن و 400 هەزار لیتر بەنزینی 800 دیناری بۆ پارێزگاكانی سلێمانی، هەڵەبجە و ئیدارەكانی گەرمیان و ڕاپەرین دابیندەكرێت و وەزارەتی سامانە سروشتییەكان كار دەكات كوالێتیی بەنزینە 800 دینارییەكە ڕۆژ بە ڕۆژ زیاتر بەرزبكاتەوە.
ئاماژە بەوەشكراوە، لە كۆبوونەوەی هەفتەی ڕابردووی ئەنجومەنی پارێزگای سلێمانیدا چەند بڕیارێك لەبارەی بەنزینەوە دراون و بڕیار درا بە نووسراو بۆ وەزارەتی سامانە سروشتییەكان بەرزبكرێتەوە كە خۆی لە زیادكردنی بڕی بەنزینی 800 دیناری و بەرزكردنەوەی كوالێتییەكە و هەرزانكردنی نرخەكەی دەبینێتەوە و بڕیارە سبەینێ دوو شەممە لە ئەنجومەنی پارێزگای سلێمانییەوە نووسراوەكە بۆ وەزارەتی سامانە سروشتییەكان بنێردرێت.
