ئەندامێکی ئەنجومەنی نوێنەرانی عێراق رایدەگەیەنێت، تێپەڕاندنی پرۆژەیاسای بەپارێزگابوونی هەڵەبجە هەوڵ و ماندوبوونێکی زۆری ویستووە و دەشڵێت، هەر قەزایەکی دیکە داوای بەپارێزگابوون دەکات، کێشەمان لەگەڵی نییە.
چرۆ حەمەشەریف، ئەندامی ئەنجومەنی نوێنەرانی عێراق بە تۆڕی میدیایی ئێستای راگەیاند، پرۆژەیاسای بەپارێزگابوونی هەڵەبجە لە ساڵی 2014ـوە لەناو ئەنجومەنی نوێنەرانی عێراقدایە و بە 12 ساڵ تێپەڕیوە، ئەمەش کەسی دڵسۆزی ویستووە.
وتیشی، بۆ بەپارێزگابوونی هەڵەبجە نوسراو و واژوویەکی زۆرمان ئاراستەی سەرۆکایەتیی ئەنجومەنی نوێنەران کردووە، سەرۆکی فراکسیۆنی یەکێتی و بافڵ جەلال تاڵەبانیش، لە هەوڵی بەردەوامدابوون بۆ تێپەڕاندنی پرۆژەیاساکە.
ئاماژەی بەوەشکرد، ئەگەر هاوکاریی بەشێک لە پەرلەمانتارەکانی دیکە لە پێکهاتەی عەرەب نەبووایە، پرۆژەیاسای بەپارێزگابوونی هەڵەبجە تێنەدەپەڕێندرا، هاوکات سەرۆکی لیژنەی هەرێم و پارێزگاکانیش، پاڵپشتیی بەردەوامی تێپەڕاندنی پرۆژەیاساکە بووە.
لە ماوەی رابردوودا، میدیا عێراقییەکان لە زاری چەند پەرلەمانتارێکەوە ئاماژەیان بەوەکردبوو، پێویستە هەریەکە لە قەزاکانی تەلەعفەر، دوزخورماتوو و چەند قەزایەکی دیکە، وەک هەڵەبجە بکرێنە پارێزگا؛ چرۆ حەمەشەریف لەوبارەیەوە وتی، تەمەنی پەرلەمانی عێراق لە تەواوبووندایە و هەڵبژاردن نزیکە، ئەوەی ئەو پەرلەمانتارانەش دەیکەن بەشێکە لە بانگەشەی هەڵبژاردن، بەڵام ئێمە وەکو پەرلەمانتارانی کورد، هەر شوێنێک داوای بەپارێزگابوون دەکات کێشەمان نییە.
