بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە محەمەد شیاع سودانی، سەرۆك وەزیرانی عێراق كرد.
لە دیدارێكدا كە قوباد تاڵەبانی، ئەندامی مەكتەبی سیاسی ئامادەیبوو، گفتوگۆی چڕوپڕ لەسەر دۆسیەكانی تایبەت بە عێراق و ناوچەكە و پەیوەندییەكانی نێوان هەولێر و بەغداد كرا و جەخت لە هەوڵەكان بۆ دوورخستنەوەی عێراق لە كێشمەكێشمەكانی ناوچەكە كرایەوە.
بافڵ جەلال تاڵەبانی و محەمەد شیاع سودانی جەختیان لەوە كردەوە كە پەیوەندییەكانی نێوان هەرێمی كوردستان و بەغداد بەرەوپێشچوونی بەرچاوی بەخۆیەوە بینیوە و پێویستە هەوڵ بۆ چارەسەركردنی بنەڕەتی كێشەكان لەسەر بنەمای دەستوور و پاراستنی بەرژەوەندیی هاونیشتمانییان بدرێت.
لە كۆبوونەوەكەدا هەردوولا باسیان لە هەڵبژاردنی ئەنجوومەنی نوێنەرانی عێراق كرد و جەختیان لە بەڕێوەچوونی هەڵبژاردنێكی پاك و بێگەرد كردەوە.
سەرۆك بافڵ هەنگاوەكانی پێكهێنانی كابینەی نوێی حكومەتی هەرێمی كوردستانی روونكردەوە و وتی، “ئامانجمانە كابینەی نوێ داواكاریی هاونیشتمانییان جێبەجێبكات و ببێتە هۆی بەهێزتركردنی قەوارەی هەرێمی كوردستان”.
هەر لە كۆبوونەوەكەدا سەرۆك وەزیرانی عێراق رۆڵی یەكێتیی نیشتمانیی كوردستانی لە نزیككردنەوەی لایەنە سیاسییەكانی هەرێمی كوردستان و عێراق بەرزنرخاند و بە رێزەوە باسی لەو هەوڵانە كرد كە لە سەردەمی سەرۆك مام جەلالەوە تاوەكو ئێستا بەردەوامیان هەیە بۆ دروستكردنی یەكڕیزیی و هاوهەڵوێستی لە نێوان لایەنەكان.
