ئەمڕۆ 21ی حوزەیران، دادگای دەستووریی تورکیا دۆسیەی داخستنی پارتی دیموکراتی گەلان-ی وەرگرت و دەرگایەکی دیکەی لەسەر داخستنی پارتەکە کردەوە.
تۆمەتی داخستن و قەدەغەکردنی هەدەپە پەیوەندیی پارتەكەیە بە پارتی کرێکارانی کوردستان – پەکەکەوە، بەڵام ئەو تۆمەتە بەردەوام لەلایەن بەرپرس و ئەندامانی هەدەپەوە ڕەتکراوەتەوە.
هەوڵدان بۆ داخستنی هەدەپە، پرسێكی نوێ نییە و پێشتریش لە مانگی ئازار دادگای دەستووریی تورکیا دۆسییەی داخستنی هەدەپەی ڕەتکردەوە، بەپێی دەستووری وڵات ئەمجارە دادگا ناتوانێت داواکە ڕەتبکاتەوە.
لەگەڵ ئەوەشدا سەدان ئەندامی پارتەكە زیندانیکراون، ئەمە سەرەڕای دامەزرێنەر و هاوسەرۆکانی پێشووتری پارتەكە، کە تا ئێستاش لە زینداندان.
پێدەچێت لەئەگەری بڕیاری داخستنی سێهەمین گەورە پارتی پەرلەمانی تورکیا، كاردانەوەی گەورەی لێبكەوێتەوە، بەتایبەت لە ڕێکخراوە نێودەوڵەتییەکان و یەکێتیی ئەوروپاوە، كە پێشتر هۆشدارییان لە هەنگاوێکی لەوشێوەیە داوە.
