بەڕێوەبەری کشتوکاڵی سلێمانی، رایگەیاند، “بەرهەمی گەنمی زۆرینەی ناوچەکانی سنووری سلێمانی لە مەترسیدایە”.
شاڵاو جەمال، بەڕێوەبەری کشتوکاڵی سلێمانی، بە تۆڕی میدیایی ئێستای راگەیاند، بەهۆی کەمبارانییەوە بەرهەمی گەنم لە مەترسیدایە، لەم مانگی چوارەدا پێویستمان بە 75 ملیمەتر باران هەیە، بەپێچەوانەوە بەرهەمی گەنمی زۆربەی ناوچەکانی سنووری سلێمانی (گەرمیان، چەمچەماڵ، ئاغجەلەر، سەنگاو، بنگرد و رانیە) لە مەترسیدایە جگە لە عەربەت و سەیدسادق کە لەو دوو ناوچەیە رووبەرێکی فراوانی زەوی بە گەنم داچێندراوە.
لەبارەی رووبەری داچێندراوی سنووری سلێمانی بە گەنم، شاڵاو جەمال وتی، “ئەمساڵ لە سنووری پارێزگای سلێمانی هاوشێوەی ساڵی رابردوو ملیۆنێک و 190 هەزار دۆنم زەوی بە گەنم داچێندراوە، ساڵی رابردوو حکومەتی عێراق 700 هەزار تۆن گەنمی لە هەرێم وەرگرت، بەڵام ئەمساڵ کەمیکردووەتەوە بۆ 400 هەزار تۆن و هەر تۆنێک بە 850 هەزار دینار وەردەگرێت”.
