کەشناسیی هەرێم رایگەیاند، “بەفر و بارانبارین چەند ناوچەیەکی هەرێم دەگرێتەوە”.
بەڕێوەبەرایەتیی گشتیی کەشناسی و بومەلەرزەزانیی هەرێم لە راگەیەندراوێکدا بڵاویکردەوە، “لە ئەنجامی هاتنی نزمە پاڵەپەستۆی دەریای سوور و تێكەڵبوونی بارستەهەوایەكی سارد بە كەشی ناوچەكەمان لە رۆژی دووشەممەوە ئاسمانی هەرێم هەور و نیمچەهەور دەبێت، باران بەشێوەی نمەباران و بارانی مامناوەند لە ناوچەی جیاجیا دەبارێت”.
کەشناسیی هەرێم دەشڵێت، “كاریگەریی ئەم شەپۆلە لە شەوی دووشەممە لەسەر سێشەممە زیاددەبێت، ئاستی دابارین مامناوەند و هەندێک كات لێزمەباران و هەورەبروسکەش دەبێت، لەگەڵ زیادبوونی كاریگەریی نزمە پاڵەپەستۆی دەریای سوور لە رۆژی سێشەممە كاریگەریی شەپۆلی بارانبارین فراوان و زیاتردەبێت لە سەرجەم ناوچەكان باران دەبارێت”.
باس لەوەشدەکات، “لەدرەنگانی شەوی سێشەممە لەسەر چوارشەممە كاریگەریی ئەم شەپۆلە كۆتاییدێت، لەماوەی كاریگەریی شەپۆلەکە پێشبینیی زیادبوونی خێرایی باو بەرزبوونەوەی تۆز و خۆڵ دەکرێت كەهەندێک كات لەگەڵ باران تێكەڵدەبێت و ئەگەری بارینی بەفرێكی كەم لەسەر لوتكەی ناوچە شاخاوییە سنوورییەكان هەیە”.
