ئەمڕۆ وەفدی ئەمریکا و ئێران دەربارەی چەند پرسێک لە وڵاتی عومان کۆدەبنەوە.
ئەمڕۆ شەممە، میدیا جیهانییەکان بڵاویانکردەوە، بڕیارە وەفدی هەردوو وڵاتی ئەمریکا و ئێران دەربارەی چەند پرسێک کۆببنەوە، گرنگترینیان بابەتی بەرنامە ئەتۆمییەکەی ئێران و بەهێزکردنی پەیوەندییە سیاسیی و ئابورییەکانیانە.
ئەوەشیان خستەڕوو، کۆبوونەوەکەی ئەمڕۆ، بە ئامادەبوونی هەریەکە لە ستیڤ وێتکۆف نوێنەری تایبەتی دۆناڵد ترەمپ و عەباس عێراقچی وەزیری دەرەوەی ئێران لە وڵاتی عومان بەرێوەدەچێت و دەبێتە یەکەمین کۆبوونەوەی راستەوخۆی بەرپرسانی ئەو دوو وڵاتە لەم چەند ساڵەی رابردوودا.
ئاماژەیان بەوەشدا، لەچەند رۆژی رابردوودا دۆناڵد ترەمپ سەرۆک ئەمریکا دەرگای گفتووگۆی لەگەڵ ئێراندا کردەوە و ئامادەیی خۆی بۆ ئەنجامدانی رێکەوتن دەربارەی چەند پرسێک لەوانە بەرنامە ئەتۆمییەکەی ئێران خستەڕوو.
