بەرگریی شارستانیی سلێمانی: رووداوەکەی ئەمڕۆی بانی مەقان هیچ زیانێکی گیانی لێنەکەوتەوە

بەڕێوەبەرایەتیی بەرگریی شارستانیی سلێمانی لەبارەی رووداوی پێکدادانی دوو بارهەڵگرەکەی سەر رێگای کەرکوک – سلێمانی، راگەیەندراوێکی بڵاوکردەوە.

لە راگەیەندراوەکەی بەرگریی شارستانیدا هاتووە، ئەمڕۆ رێکەوتی 4/4/2025، کاتژمێر 03:00ی پاشنیوەڕۆ، تیمەکانی بەرگریی شارستانی ئاگادارکرانەوە لە بوونی رووداوێکی پێکدادان لەنێوان دوو ئۆتۆمبێلی بارهەڵگردا، لەسەر رێگای بانی مەقان، نزیک ناحیەی قەرەهەنجیر.

ئاماژەی بەوەشدا، بەهۆی توندیی پێکدادانەکەوە، هەردوو بارهەڵگرەکە ئاگریان گرت و دەستبەجێ تیمەکانی ئاگرکوژێنەوە لە بنکەکانی (چەمچەماڵ، شۆڕش، تەکێی جەباری) و چوار بنکەی تری ئاگرکوژێنەوە لە پارێزگای کەرکوک، گەیشتنە شوێنی رووداوەکە.

دەشڵێت، توانرا لە ماوەیەکی گونجاودا ئاگرەکە بە تەواوی کۆنترۆڵ بکرێت و رێگری لە تەشەنەسەندنی زیاتری بگیرێت.

لە راگەیەندراوەکەی بەرگریی شارستانیی سلێمانیدا ئەوەش هاتووە، رووداوەکە هیچ زیانێکی گیانی لێنەکەوتەوە و تەنها زیانی ماددی بەر هەردوو ئۆتۆمبێلە بارهەڵگرەکە کەوتووە.

ئەوەشخراوەتەڕوو، بەهۆی رووداوەکە و کاری تیمەکانی فریاگوزارییەوە، رێگای سەرەکیی نێوان کەرکوک – چەمچەماڵ، بۆ ماوەی زیاتر لە دوو کاتژمێر بەربەستکرا لە هاتوچۆکردن.