چەند رێنماییەک بۆ پاراستنی تەندروستیی مرۆڤ لە رۆژانی جەژندا بڵاودەکرێنەوە، کە تایبەتن بە تەندروستیی جەستە و پەیڕەوکردنی سیستەمی خۆراکی گونجاو.
ماڵپەڕی Gulf News چەند رێنماییەکی تایبەت بە رۆژانی جەژن بڵاوکردووەتەوە، کە یارمەتیدەر دەبێت تا تەندروستتر رۆژانی جەژن بەسەربەرین و پارێزگاری لە تەندروستیی جەستەمان بکەین.
ماڵپەڕەکە ئاماژەی بەوەداوە، بەهۆی ئەوەی مرۆڤ بە درێژایی مانگی رەمەزان، کەمترین رێژەی خواردن و خواردنەوەی خواردووە و کۆئەندامی هەرس لەو ماوەیەدا پشووی داوە، هەربۆیە گونجاو نییە راستەوخۆ دوای ئەو ماوەیە رێژەیەکی زۆری خواردن و چەوری و شیرینی بەکاربهێنرێت، چونکە بەپێچەوانە کاریگەریی نەرێنی لەسەر تەندروستیی مرۆڤ دروستدەکات و دەبێتە هۆی سەرهەڵدانی چەندین نەخۆشی لەوانە: کێشەی هەرسکردن، زیادبوونی کێش و چەندین زیانی دیکە.
ئەوەشی خستووەتەڕوو، لە رۆژانی جەژندا پێویستە رەچاوی چەند رێنماییەک بکرێت لەپێناو تەندروستتر بوونی بۆنەکەمان و پاراستنی تەندروستیی مرۆڤ لە هەر حاڵەتێکی نەخوازراوی لەوانە:
یەکەم: دوای خواردنی ژەمی سەرەکی دامەنیشە و هەوڵبدە پیاسەیەکی کورت بکەیت.
دووەم: بە ئارامی نان بخۆ و دووربکەوە لە پەلەکردن، هەروەها خواردن بە باشی بجوە.
سێێەم: ئەو خواردنانە بخۆ کە دەوڵەمەندن بە ریشاڵ، وەک زەڵاتە و دانەوێڵە.
چوارەم: خواردنی دەرەوە کەمتر بخۆ و تا دەتوانیت لە ماڵەوە دروستییان بکە.
پێنجەم: زیادەڕەوی لە خواردنی شیرینی و خواردنەوە گازییەکاندا مەکە.
