ئاژانسی (بەغداد ئەلیەوم) بڵاویکردەوە، ئەمڕۆ زیاتر لە 954 ملیار دینار دەخرێتە سەر هەژماری وەزارەتی دارایی هەرێم و راستەوخۆ خشتەی مووچە رادەگەیەندرێت.
سەرچاوەیەکی ئاگادار بە ئاژانسەکەی راگەیاند، وەزارەتی دارایی عێراق وردبینیی لە لیستی مووچەی مانگی سێی مووچەخۆرانی هەرێمی کوردستان تەواوکردووە و ئەمڕۆ چوارشەممە، زیاتر لە 950 ملیار دینار دەخرێتە سەر هەژماری بانکیی وەزارەتی دارایی هەرێم.
دەشڵێت، دەستبەجێ دارایی هەرێم خشتەی مووچەی مانگی سێ بڵاودەکاتەوە و تا رۆژی شەممە، مووچەی سەرجەم مووچەخۆران دابەشدەکرێت.
دوێنێ سێشەممە، وەزارەتی دارایی و ئابوریی هەرێم رایگەیاند، رێکارەکانی ناردنی تەمویلی مووچە کە بڕەکەی 954 ملیار و 880 ملیۆن و 467 هەزار و 779 دینارە تەواوکرا و بڕیارە ئەمڕۆ، پارەکە بخرێتە سەر هەژماری بانکی وەزارەتەکە.
هەر دوێنێ پێشەوا هەورامانی، وتەبێژی حکومەتی هەرێمی کوردستان رایگەیاند، ئەگەر پارەکەی بەغداد بگاتە دەستمان، پێش جەژن مووچەی سەرجەم مووچەخۆران دابەشدەکەین.
