ئاماری هاوسەرگیریی و جیابوونەوە لە هەرێمی كوردستان بڵاوكرانەوە

ئەنجومەنی دادوەریی هەرێم لە راگەیەندراوێكدا ئاماری ساڵی 2024ی تایبەت بە هاوسەرگیریی و جیابوونەوە بڵاوكردەوە.

ئەنجومەنی دادوەریی هەرێمی كوردستان لە راگەیەندراوێكدا بڵاویكردەوە، ئامارەكانی مامەڵە لە رێككەوتی (1-1 تا 31-12-2024)ە و تێیدا ئاماری هاوسەرگیریی، جیابوونەوە و كارەكانی ئەنجومەنی دادوەریی و تێهەڵچوونەوە خراونەتەڕوو.

ئاماژەی بەوەشكردووە، تەنها لە ساڵی 2024دا، دوو هەزار و 264 دۆسیەی لێكۆڵینەوە لە توندوتیژی دژی خێزان لە هەولێر، سێ هەزار و 280 دۆسیە لە سلێمانی، هەزار و حەوت دۆسیە لە كەركوك و گەرمیان سێ هەزار و 787 دۆسیەش لە دهۆك یەكلا كراونەتەوە و كۆی گشتی ئەو دۆسیەیانەش 10 هەزار و 338 دۆسیە بوون.

باسی لەوەشكردووە، لە ساڵی 2024دا، 51 هەزار و 18 مامەڵەی مارەبڕین لە هەرێمی كوردستان ئەنجامدراون بەشێوەیەك 17 هەزار و 591 مامەڵەیان لە هەولێر، 18 هەزار و 522 مامەڵە لە سلێمانی، دوو هەزار و 706 مامەڵە لە كەركوك و گەرمیان و 12 هەزار و 199 مامەڵەیان لە دهۆك بووە.

ئەنجومەنی دادوەریی باسی لەوەشكردووە، لە هەولێر سێ هەزار و 878 حاڵەتی لێكجیابوونەوە لە هەولێر، پێنج هەزار و 745 حاڵەت لە سلێمانی، دوو هەزار و 33 حاڵەت لە دهۆك و 728 حاڵەتیش لە كەركوك و گەرمیان تۆماركراون.