لە هێرشە ئاسمانییەكەی دوێنێی توركیا بۆسەر قامیشلۆی ڕۆژئاوای كوردستان، چوار كەس شەهید بوون كە دووانیان منداڵن.
هێزەکانی ئاسایشی ناوخۆی ڕۆژئاوای كوردستان وردەکاریی بۆردومانەکەی شاری قامیشلۆیان ئاشکراکرد، كە دوێنێ توركیا لەڕێگەی درۆنەوە ئەنجامیدابوو، ڕایانگەیاند، “دەوڵەتی داگیرکەری تورک بە فڕۆکەیەکی بێفڕۆکەوان ئۆتۆمبێلێکیان بۆردومان کردووە و لە ئۆتۆمبێلەکەدا چوار کەس شەهیدبوون و دوو کەسی دیکەش برینداربوون”.
هێرشەكە ئێوارەی دوێنێ لە گەڕەكی سەناعەی شاری قامیشلۆ ئەنجامدراوە و تیایدا “فرۆکەیەکی بێفڕۆکەوانی دەوڵەتی تورکی داگیرکەر ئۆتۆمبێلێكی كردووەتە ئامانج”.
ئاسایشی ڕۆژئاوا ئاشكرایكردووە، شەش كەس بوونەتە قوربانیی هێرشەكەی توركیا، چوار کەس شەهیدبوون، کە دووانیان منداڵن، دوو هاووڵاتیی دیکەش برینداربوون و دۆخیان قورسە و گواستراونەتەوە بۆ نەخۆشخانە.
ئەمە جگە لەوەی زیانی گەورەی ماددی بە چەند ئۆتۆمبێلێك و دوکانەكانی ناوچەکە گەیشتووە.
