وتەبێژی وەزارەتی دادی عێراق پێکهێنانی لیژنەیەکی بەمەبەستی بەدواداچوون بۆ گەڕاندنەوەی زەوییەکان بۆ خاوەنەکانیان راگەیاند.
ئەحمەد لەعێبی، وتەبێژی وەزارەتی دادی عێراق لە لێدوانێکدا رایگەیاند، “لیژنەکە تاوتوێی جێبەجێکردنی یاسای ژمارە 3ی ساڵی 2025ـی کرد، کە یاسای هەڵوەشاندنەوەی بڕیارەکانی ئەنجومەنی سەرکردایەتیی شۆڕشە تایبەت بە گەڕاندنەوەی زەوییەکان بۆ خاوەنەکانیان”.
وتیشی، دەرکردنی رێنمایی بۆ جێبەجێکردنی یاساکە، پێویستی بە شەش مانگ دەبێت.
ئاماژەی بەوەشکرد، “لیژنەکە راسپاردەیەکی پێشکەش بە سەرۆکی حکومەت کردووە، بۆ ئەوەی فەرماندەیی ئۆپراسیۆنەکانی کەرکوک راسپێرێت، بۆ لابردنی دەستدرێژیکردنە سەر ئەو موڵکانەی کە ناکۆکیی یاسایییان لەسەرنییە”.
رۆژی 21/1/2025، پرۆژەیاسای هەڵوەشاندنەوەی بڕیارەکانی ئەنجومەنی سەرکردایەتیی شۆڕشی هەڵوەشاوە و گەڕاندنەوەی زەوییەکان بۆ خاوەنە رەسەنەکانیان لە پەرلەمانى عێراق، دەنگى لەسەردرا.
