زۆرینەی ئەو کەسە بەتەمەنانەی لە نزیکمانن کێشەی کەمخەوییان هەیە بە تایبەت لە شەواندا، توێژینەوەیەکەیش سەلماندوویەتی 40-70% ی کەسانی سەروو تەمەن 65 ساڵ رووبەڕووی ئەم کێشەیە دەبنەوە.
بەپێی ئەنجامی توێژینەوەکە کە لەلایەن دەزگای خەوی ئەمریکی بڵاوکراوەتەوە، 40-70% ی کەسانی سەروو تەمەن 65 ساڵ تووشی کەمخەوی درێژخایەن بوونەتەوە بە تایبەت لە کاتەکانی شەودا.
ئاماژەی بەوەشکردووە، بەشێک لە هۆکارەکانی کەمخەوی بۆ گۆڕانکاری لە هۆڕمۆنەکان، زوو میزکردن، وەستانی هەناسە و گەرمابوون و ئارەقەکردن دەگەڕێتەوە، جگە لەوەش زۆرینەی کەسانی بەتەمەن بەهۆی زۆری کاتی بەتاڵەوە کاتەکانی رۆژیان بە خەو بەسەردەبەن و لە کاتی شەودا ناتوانن بخەونەوە.
توێژەران دەڵێن، کەمخەوی کەسانی بەتەمەن لە کاتەکانی شەودا حاڵەتێکی ئاساییە و جێگای مەترسی نییە، چونکە لە راستیدا وەک منداڵ نین پێویستیان بە خەوی زۆربێت.
بۆ ئەوەی کەسانی بەتەمەن خەوێکی ئاسوودە بکەن، پێویستە شوێنێکی سارد و بێدەنگ و تاریکیان بۆ دابینبکرێت، پێش نووستن چەندین جار هەناسەی قووڵ هەڵمژن و لە کاتەکانی رۆژدا نەخەون.
