وتەبێژی وەزارەتی پلاندانانی عێراق رایگەیاند، ستراتیژیی بەرەنگاربوونەوەی هەژاری بەندە بە داتای سەرژمێریی دانیشتووان و ئەنجامەکانی سەرژمێرییش، بۆ هەمواركردنەوەی رێڕەوی پلانێکی پێنج ساڵە بەکاردەهێنرێت.
عەبدولزەهرا هنداوی، وتەبێژی وەزارەتی پلاندانانی عێراق لە لێدوانێکدا رایگەیاند، ئەو داتایانەی لە سەرژمێریی گشتیی دانیشتووان دەرهێنراون، وێنەیەكی وردی راستەقینەی عێراق دەخەنەڕوو، هەروەها دەخرێنە بەردەم لایەنە پەیوەندیدارەكان بۆ ئاراستەكردنی سیاسەتەكانی گەشەپێدان بە ئاراستەی پڕكردنەوەی بۆشاییەكانی كەرتە جیاوازەكان.
وتیشی، لەئێستادا وەزارەت سەرقاڵی ئامادەكردنی راپۆرتێكی وردە و تێیدا ئەو بۆشاییانە دەستنیشاندەكات، كە لە سەرژمێرییەكەدا دەركەوتووە، چ لەسەر ئاستی خزمەتگوزاری، ژێرخانی ئابووری، پرۆژە، یان یەكە كارگێڕییەكان، لە بچوكترین یەكەی كارگێڕییەوە دەستپێبكات تا دەگاتە ئاستی گوند و قەزاكان.
ئاماژەی بەوەشكرد، ئەنجامی سەرژمێری بۆ هەمواركردنەوەی رێگاكانی ئەو پلانە پێنج ساڵەی كە لە ساڵی 2024 دەستیپێكردووە بەكاردەهێنرێت، بەو پێیەی تیم و لیژنەی تایبەتمەند بۆ چارەسەركردنی ئەو لایەنانە پێكهێنراون.
هنداوی باسیلەوەشکرد، وەزارەت بەنیازە دوای مانگی رەمەزان، ستراتیژی كەمكردنەوەی هەژاری بۆ ماوەی پێنج ساڵ دەستپێبكات، بە سودوەرگرتن لە داتاكانی سەرژمێری.
راشیگەیاند، یەكێك لە ئامانجە سەرەكییەكانی سەرژمێری، دڵنیابوونە لە دابەشكردنی دادپەروەرانەی داهات لە نێوان پارێزگاكاندا، بەوپێیەی خەمڵاندنەكانی پێشوو لەسەر بنەمای پێشبینیكردن بووە. ئێستا، سەرچاوەكان بە پشتبەستن بە ئاماری ورد و متمانەپێكراو تەرخاندەكرێت و هەر پارێزگایەك، بەپێی ژمارەی دانیشتوانی راستەقینەی خۆی، شایستەی خۆی وەردەگرێت.
