بافڵ جەلال تاڵەبانی، سەرۆکی یەکێتیی نیشتمانیی کوردستان لەبارەی پەیامەکەی عەبدوڵا ئۆجەلان رایگەیاند، پەیامێکی بەرپرسیارانە و پێویستی ئەم قۆناغەیە بۆ یەکخستنی ریزەکانی کوردایەتی.
بافڵ جەلال تاڵەبانی لە پەیامەکەدا نوسیویەتی، “پێشوازی لە پەیامەکەی بەڕێز عەبدوڵا ئۆجەلان دەکەین، پێمانوایە پەیامێکی بەرپرسیارانە و پێویستی ئەم قۆناغەیە بۆ یەکخستنی ریزەکانی کوردایەتی و چارەسەرکردنی ئاشتییانەی کێشەکان لەسەر بنەمای هاوبەشێتی و پێکەوەیی بۆ بنیادنانی داهاتوویەکی پرشنگدار و ئارامتر بۆ گەلەکەمان”.
ئاماژەی بەوەشکردووە، “یەکێتیی نیشتمانیی کوردستان ئەم پەیامە بە سەرەتا و قۆناغێکی گرنگ دەزانێت و وەک ئەرکێکی نەتەوەیی بەرپرسیار پشتیوانی ئەم پەیامە و سەرخستنی هەر هەنگاو و پرۆژەیەکە کە گیانی پێکەوەیی و برایەتی لەنێوان کورد و تورک دەباتە پێشەوە”.
دەشڵێت، هیوادارین هەموولایەکمان بەدەم ئەم پەیامەوە بچین و هەنگاوی کرداریی بنێین بۆ گەیشتن بە ئاشتیی سەرتاسەری و ئەم دەرفەتە مێژووییە لەدەستنەدەین کە سەرۆک مام جەلال بەردی بناغەکەی لە ساڵی 1993ـەوە داناوە.
سەرۆکی یەکێتی باسلەوەشدەکات، “وەک وتووشمانە، ئێمە پشتیوانی خوشک و براکانمانین لە هەر چوار پارچەی کوردستان”.
عەبدوڵڵا ئۆجەلان، رێبەری زیندانیکراوی پەکەکە ئەمڕۆ پێنجشەممە لە بانگەوازێکدا رایگەیاند، داوای چەکدانان لە پەکەکە دەکەم و بەرپرسیاریەتیی مێژووییشی لەئەستۆدەگرم. داوا لە پەکەکە دەکەم کۆنگرەی خۆی بکات و هەموو گروپەکان خۆیان هەڵبوەشێننەوە.
