بەبێ ئامادەبوونی لایەنە کوردییەکان، یەکەم کۆنگرەی دیالۆگی نیشتمانیی سوریا لە دیمەشقی پایتەختی وڵاتەکە دەستیپێکرد.
ئەمڕۆ سێشەممە کۆنگرەی دیالۆگی نیشتمانیی سوریا بە بەشداریی 600 کەسایەتیی سوریا جگە لە لایەنە کوردییەکان لە دیمەشق دەستیپێکرد.
لە وتاری دەستپێکی کۆنگرەکەدا ئەحمەد شەرع سەرۆکی کاتی سوریا رایگەیاند، “سورییەکان خۆیان وڵاتەکەیان رزگارکرد، بۆیە ژێردەستەیی لە هیچ کەسێک قبووڵ ناکەن، سوریا ئێستا گەڕاوەتەوە بۆ گەلەکەی خۆی پاش ئەوەی لە رابردوودا لێیان دزرابوو”.
وتیشی، “راستە سوریا لە ونبوون رزگارکرا، بەڵام هێشتا ئالنگاریی گەورە لەبەردەم وڵاتەکەدا ماون”.
سەبارەت بە هەڵوەشاندنەوەی گروپە چەکدارەکان شەرع جەختیکردەوە، پێویستە چەک لە دەستی دەوڵەت بێت و ئەنجامدانی ئەمەش ئەرکی ئێمەیە.
بڕیارە لە کۆنگرەکەدا ئامادەبووان راسپاردەی تایبەتی خۆیان تایبەت بە قۆناغی ئایندەی سوریا بنووسنەوە.
