بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە دانیال روبنستین، كاربەڕێكەری باڵیۆزخانەی ئەمریكا لە عێراق و ستیڤن بیتنەر، كونسوڵی گشتیی ئەمریكا لە هەرێمی كوردستان كرد.
لە كۆبوونەوەكەدا پێشهات و رووداوە سیاسی، ئابوری و ئەمنییەكانی ناوچەكە تاوتوێكرا و جەخت لە هەماهەنگی نێوان لایەنەكان و پێویستی پاراستنی سەقامگیری و ئارامی كرایەوە.
هەر لە كۆبوونەوەكەدا سەرۆك بافڵ لەبارەی هەنگاوەكانی پێكهێنانی حكومەتی نوێی هەرێمی كوردستان رایگەیاند، دەربەستانە بۆ باشتركردنی دۆخی هەرێمی كوردستان، ژیانی خەڵكەكەمان و بوونیادنانی حكومەتێكی بەهێز لە هەوڵی بەردەوامداین و پەرۆشین بۆ گۆڕانكاریی ریشەیی لە بەڕێوەبردنی وڵاتەكەمان بە ویست و بەرژەوەندیی هاوڵاتییان.
لەبارەی كێشەكانی بەغداد و هەولێر سەرۆك بافڵ جەلال تاڵەبانی جەختی لە چارەسەركردنی كێشەكان لەسەر بنەمای دەستوور و لێكتێگەیشتن و رێككەوتنە سیاسییەكان كردەوە و وتی، “دەبێت هەموومان بەرپرسیارانە ئەم دۆخە لەبەرچاوبگرین و زەمینەی زیاتر بڕەخسێنین بۆ گەیشتن بە ئەنجامێك كە لە بەرژەوەندیی خەڵك وڵاتەكەماندا بێت.
