ئەنجوومەنی باڵای دادوەری عێراق، ئاماری مانگی رابردووی هاوسەرگیریی و حاڵەتی جیابوونەوەی لە عیراقدا راگەیاند.
ئەمڕۆ پێنجشەممە، ئەنجوومەنی باڵای دادوەری عێراق، ئامارەکانی هاوسەرگریی و جیابوونەوەی لە مانگی کانوونی دووەمدا لە عێراقدا راگەیاند، کە بەپێی ئامارەکان 29 هەزار و 119 هاوسەرگیریی ئەنجامدراوە و لەهەمانکاتدا شەش هەزار و 448 حاڵەتی جیابوونەوە تۆمارکراوە.
هاوکات، بەپێی ئامارەکان، بەغداد زۆرترین حاڵەتی هاوسەرگیریی و جیابووەنەوەی لێ تۆمارکراوە و لە پلەی یەکەمی شارەکانی عێراقدا دێت، کە رێژەی هاوسەرگریی حەوت هەزار و 426 حاڵەت بووە و دوو هەزار و 245 حاڵەتی جیابوونەوە تۆمارکراوە.
ئاماژە بەوەشدراوە، پارێزگای سەڵاحەدین کەمترین حاڵەتی جیابوونەوەی لێ تۆمارکراوە بەراورد بە شار و ناوچەکانی عێراق بە 128حاڵەتی جیابوونەوە.
ئەوەش خراوەتەڕوو، ئامارەکانی تایبەت بە هاوسەرگیریی و حاڵەتی جیابوونەوە تەنها شار و ناوچەکانی عێراق دەگرێتەوە و هەرێمی کوردستان ناگرێتەوە.
