ئێران “گەورەترین پاڵاوگەی گازی سروشتی لە ڕۆژهەڵاتی ناوەڕاست” دروست دەكات

سەرۆكی ئێران ئاشكرایكرد، گەورەترین پاڵاوگەی گازی سروشتی لە ڕۆژهەڵاتی ناوەڕاست دروست دەكەن، بەهای پرۆژەكەش 3 ملیار و 400 ملیۆن دۆلار دەبێت.

بەگوێرەی هەواڵی ئاژانسە ئێرانییەكان حەسەن ڕۆحانی، سەرۆكی ئێران ئەمڕۆ پێنجشەممە 21ی كانونی دووەم ئاشكرایكردووە، “بە بەهای 3 ملیار و 400 ملیۆن دۆلار گەورەترین پاڵاوگەی گازی سروشتی لە ڕۆژهەڵاتی ناوەڕاست دادەمەزرێنین”.

ئاژانسی ئێرنای ئێرانی ئاشكرایكردووە، ئەو پاڵاوگەیە لە شاری بەهبەهان لە پارێزگای خوزستان دروست دەكرێت، دەبێتە گەورەترین پاڵاوگەی گازی سروشتی لە ڕۆژهەڵاتی ناوەڕاست.

ڕۆحانی ئاماژەی بەوەشكردووە، “دروستكردنی ئەو پاڵاوگەیە هاوكاتی ڕۆشتنی ئەو كەسەیە كە پلانی هەبوو حكومەتی ئێران بڕوخێنێت، ترەمپ شكستی هێنا لەو هەنگاوەی”.

مەحمود ئەمین نەجاد، بەڕێوبەری جێبەجێكاری پاڵاوگەكە بە میدیاكانی ئێرانی ڕاگەیاندووە، “ئەو پاڵاوگەیە لەماوەی 36 مانگدا دروست دەكرێت و بودجەكەشی 3 ملیار و 400 ملیۆن دۆلار دەبێت”.