وەزارەتی دارایی عێراق رەتیدەکاتەوە هیچ کورتهێنانێک لە بودجەدا هەبێت و لەبارەی مووچەشەوە دڵنیایی دەدات.
وەزارەتی دارایی عێراق رایگەیاند، پابەندن بە دابەشکردنی مووچەی فەرمانبەران و خانەنشینان و تۆڕی پاراستنی کۆمەڵایەتی لە وادەی خۆیدا و بەپێی ئەو خشتەیەی دیاریکراوە بەبێ دواکەوتن یان کەمکردنەوەی بڕی مووچە.
ئاماژەی بەوەشکرد، هیچ کورتهێنانێک کاریگەریی لەسەر مووچە نابێت، کاردەکەن بۆ ئارامی سیاسیی و دارایی و دابینکردنی سەرجەم شایستەکان بەپێی ئەو پلانەی لەبەردەستدایە.
لای خۆیەوە جەمال کۆچەر ئەندامی لیژنەی دارایی جەختیکردەوە، مووچە پارێزراوە و پێویست بە ترس ناکات.
