دەزگای ئاسایشی هەرێم دەستگیركردنی هەشت كەسی بە تۆمەتی خراپ بەكارهێنانی تۆڕە كۆمەڵایەتییەكان راگەیاند.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، بەڕێوەبەرایەتیی ئاسایشی پارێزگای سلێمانی، بەمەبەستی بەرەنگاربوونەوەی بڵاوكراوە نەشیاوەكان، بەبڕیاری داواكاریی گشتی هەشت تۆمەتباری خراپ بەكارهێنانی تۆڕەكۆمەڵایەتییەكانی دەستگیركرد.
هەر لە راگەیەندراوەكەدا هاتووە، تۆمەتباران لەڕێگاب گرتە ڤیدیۆیی و لایڤەكانیان بابەتی نەشیاویان بڵاوكردووەتەوە و كاریگەریی نەرێنییان لەسەر تاك و خێزانەكان هەبووە.
ئاماژە بۆ ئەوەش كراوە، لەسەر داوای هاوڵاتییان بۆ زیاتر پاراستنی بەها كۆمەڵاتییەكان، بەڕێوەبەرایەتیی ئاسایشی پارێزگای سلێمانی، دوای بەدواداچوون و دەستنیشانكردنی شوێن و ناسنامەی ئەو تۆمەتبارانەی كە لە تۆڕە كۆمەڵایەتییەكان لە گرتە ڤیدیۆیی و لایڤەكانیاندا رەفتاری دوور لە نەریت و رەوشتی كۆمەڵایەتییان بڵاودەكردەوە دەستگیركران و رووبەروِوی یاسا كرانەوە.
ئەوەشخراوەتەڕوو لە هەڵمەتی بەرەنگاربوونەوەی بڵاوكراوە نەشیاوەكان، دەزگای ئاسایشی هەرێم بەپێ یاسا و بەبڕیاری دادوەر رووبەڕووی خراپ بەكارهێنەرانی تۆڕە كۆمەڵایەتییەكان دەبێتەوە و لەپێناو تێكنەدانی شیرازەی كۆمەڵگە.
