بڕیارە ئەمڕۆ کۆنفرانسى ئاسایشى میونشن 2025 دەستپێبکات کە تا 16ى ئەم مانگە لە هۆتێل بایریشر هۆف لە شارى میونشن-ى ئەڵمانیا بەردەوام دەبێت بە بەشدارى سەرکردەى وڵاتانى ناوچەکە و جیهان و بڕیاربەدەستان بۆ تاوتوێکردنى ئالنگارییە ئەمنییە نێودەوڵەتییەکان.
چاوەڕوان دەکرێت نزیکەى 60 سەرۆکى وڵات و حکومەت بەشداریی کۆنفرانسەکە بکەن، جگە لە سەدان بەرپرس و شارەزاى ناوچە جیاجیاکانى جیهان.
کۆنفرانسەکە، ساڵانەیە و لە میونشن-ى ئەڵمانیا بەڕێوەدەچێت، بە یەکێک لە دیارترین کۆنفرانسە جیهانییەکانى پەیوەست بە سیاسەتى ئاسایش و بەرگرى دادەنرێت. تیایدا سەرانى بەشدار تاوتوێى ناکۆکییە جیۆسیاسییەکان، تیرۆر، ئاسایشى ئەلیکترۆنى، پڕچەککردن و ئالنگارییە جیهانییەکانى وەک گۆڕانى ئاووهەوا و پەتا دەکەن.
کۆنفرانسەکە لە ساڵى 1963 دامەزرایەوە، سەرەتا تایبەت بوو بە پرسە ئەمنییە کیشوەرییەکان، بەڵام دواتر بووە سەکۆیەکى جیهانى بۆ گفتوگۆکردن لەبارەى گرفتە ئەمنییە زیاتر بەرفراوانەکان.
دۆخى سازدانى کۆنفرانس:
کۆنفرانسى ئەمساڵ لەکاتێکى هەستیار و یەکلاکەرەوەدا ئەنجامدەدرێت:
– حکومەتى نوێى ئەمریکا ئەرک و دەسەڵاتى وەرگرتووە.
– خولێکى یاسادانانى نوێى یەکێتیى ئەوروپا لە برۆکسل دەستپێدەکات.
– تەنها هەفتەیەک پاش کۆنفرانس، هەڵبژاردنى پەرلەمانى لە ئەڵمانیا بەڕێوەدەچێت.
خشتەى کارەکان:
– ئەمڕۆ هەینى بەرنامەى سەرەکى جەخت لەسەر حکومڕانى جیهانى، چەسپاندنى دیموکراسى و ئاووهەوا دەکاتەوە.
– شەممە تاوتوێى دۆخى سیستمى نێودەوڵەتى، گرفتە هەرێمایەتییەکان و ئاییندەى هاوبەشیی ئەودیو زەریا دەکرێت.
– یەکشەممە، کۆنفرانسەکە بە تاوتوێکردنى رۆڵى ئەوروپا لە جیهان. ئاسایشى نێودەوڵەتى- کۆنفرانسى میونشنى ساڵى 2023 و سیستمى نوێى جیهان کۆتایى دێت.
دیارترین کەسایەتییە بەشداربووەکان:
مارک رووتە، سکرتێری گشتیی ناتۆ
ئورسولا ڤۆن دێر لێین، سەرۆکی کۆمیسیۆنی ئەوروپا
جەی دی ڤانس، جێگری سەرۆکی ئەمریکا
ڤۆلۆدیمیر زیلینسکی، سەرۆکی ئۆکراینا
رۆبێرتا مێتسۆلا، سەرۆکی پەرلەمانی ئەوروپا
کەسایەتییە کوردییە بەشداربووەکان:
بافڵ جەلال تاڵەبانى، سەرۆکى یەکێتیی نیشتمانیى کوردستان
نێچیرڤان بارزانى، سەرۆکى هەرێمى کوردستان
یونس بەهرام، سیاسەتمەدار و رووناکبیرى کورد بە نوێنەرایەتى بەڕێوەبەرایەتى خۆسەر لە رۆژئاواى کوردستان.
