ستران عەبدوڵا، ئەندامی سەركردایەتیی یەكێتی دەڵێت، “هەولێر پایتەختی كوردستانە، هەڵبەت وەك ژیان و گوزەران بۆ خەڵكی بەشەرەفی هەولێرە و ئەوان خاوەنی شارن و ئەگەرچی بێ لە پایتەختبوونیشی، هەولێر هەمیشە شاری غەریب دۆست و غەریب نەوازانیش بووە”.
راشیگەیاند،كێ و لەكوێ لێی قەوماوە هەوڵێر ئامێزی برایەتی و خزمایەتی بۆ كردووەتەوە و هەولێر هەروەها چونكە پایتەختی وڵاتەكەشمانە مافی هەموو خەڵكی كوردستانیشی بەسەرەوەیە و هەولێر ئاواییەكی لاچەپ نییە كوێخایەك بتوانێت دیلان وتەنی (سەرەحەت دڵ بێ گرێ ) كوێخایەتی تیابكا و تەواو و ئەمە بچووكردنەوەی هەولێرە و هەق نییە پێی رازی بین و ئەمە لەگەڵ شانوشەوكەتی قەڵادا ناگونجێت، لەگەڵ كۆنینەیی هەولێر و بەرینی شارەكە و ردێنی سپی مێژوویەكەی وێك نایەتەوە.
باسی لەوەش كرد، هەوڵێر پایتەختی حوكمڕانیی كوردستان و ناوەندی سیاسەت و ریئاسەت و شكۆی دەوڵەتدارییە و شایستە و شایانە رەسمیی سیاسەتی رەسمی و بڕیاری بە رووداوی كوردستان بەرامبەر بەغداد و بەرامبەر ئیقلیم و دونیا لەوێوە بدرێت و دەربچێت و بچێتە واری كارییەوە.
ستران عەبدوڵا ئاماژەی بۆ ئەوەش كردووە، هەولێر ئێستا جامی شووشەیی باڵیۆزخانەكان و كورسیی پەرلەمان و دیوانی وەزارەتەكانی تیا هەس و بنەو بارەگای حزبەكانی لێیە و قەرارە لە چەند مانگی دیكەشدا كێبركێی هەڵبژاردن بكات و خەڵك و كاندید خۆیانی تیابنووێنن.
جەختیشیكردووەتەوە، كۆمسێۆنی تیایە و یەك حەمكە پاوەر و پارەی دیموكراتی تیا خەرجكراوە و سەدان وۆرك شۆپ و مەشقی و راهێنانی حوكمڕانیی هاوچەرخی بۆ خراوەتەگەڕ و خۆ ئەمە گاڵتە نییە و خۆ ئیشەڵلا ئەوانە بۆ سوعبەت نەكراون؟!
دەشڵێت، “ئێ خۆ ئەگەر بابەتەكە (میهرەگان)ی گاڵتەجاڕی و (حەفلەی تەنەكوری)سیاسیش بێت، لێگەرێن با دەقی سیناریۆكە وەك خۆی نمایان بكرێت و لە جێی ئەوەی وەك(ئیختیارەكان)ی گەمەی دامە هەمووی تێكومەكان بدەن و داش و دامە و دۆدۆشاو تێكەڵبكەن.
لە درێژەی بابەتەكەیدا باسی لەوەش كردووە، هەوڵێر هەر پایتەختی دیفاكتۆی ئێستا نییە، هەولێر پایتەختی حكومڕانیی ئاییندەشە، پایتەختی پەرلەمانی داهاتوو و حكومەتی داهاتووی هەرێمی كوردستانیشە، پەرلەمانتارەكان ، فراكسیۆنەكان لەوێ دەبن و جوولچەی گەرموگوڕی سیاسەتی لەمەوداوی وڵاتەكەشمان هەر لەوێ دەبێت.
ئەو سەركردایەتییەی یەكێتی هەوڵێر بەو دیرۆك و دێرینییەوە كەڵەگەتە، بەم ئێستاییەوە قەڵایەكی سەرفراز و بەسەبر و خۆڕاگرە، بەو ئاییندەشی وا بەرێوەیە سەربەرز و شاد و خەندانە.
لە كۆتاییدا ستران عەبدوڵا راشیگەیاندووە، جا ئەوەی ئەم دیمەنە نابینێت تەئریخی ئەربیلی نەخوێندووەتەوە، ئیبن مستەوفی ناناسێت، بۆیە ئاساییە ئەوەش نەبینێ كە دەشێ و رێی تێدەچێت و لەوانەیە و گوێی ستەمكار كەڕ بێت، بە دیموكراسیی و بە دەنگدان و بە هێزی نەرم كورد و كرمانجێكی دڵسۆز حوكمی هەوڵیری داهاتوو بكا تو لە پایتەختی كوردستانەوە حوكمی هەموو كوردستانیش بگەشێنێتەوە و ئەمە نە كوفرە، نە عەیبە و نە عاجباتی و ئەمە گەمەی دیموكراسی و دەوورانی مێژوو و ئازایەتیی هەوڵێرییەكان و كوردستانییان دوا قسەی تیادەكەن و فەرهەنگەكە گۆڕاوە و قەناعەتەكە جوولاوە، زەمانەش رەسمی جارانی نەماوە.
