بەشی بەدواداچوون و هەڵسەنگاندنی بۆردی راگەیاندنی یەكێتی وەڵامی درەو میدیا دەداتەوە و دەڵێت،”نابێت شوێنگۆڕكێ بە ناوەڕۆكی دیداری كەسایەتییەكان بكات”.
بەشی بەدواداچوون و هەڵسەنگاندنی بۆردی راگەیاندنی یەكێتی دەڵێت، “درەومیدیا دیدارێكی تۆماركراوی هونەرمەند مستەفا ئەحمەدی بڵاوكردووەتەوە كە بیرەوەریی و پشتیوانییەكانی سەرۆك مام جەلال بۆ هونەرمەندان و شانۆكاران باسدەكات و سەرگوزشتە و تاقیكردنەوەیەكی مام جەلالیش بۆ هاندان دەگێڕێتەوە، بەڵام ئەوەی جێگەی داخە ئەم دەزگایە لە دەرەوەی ئیتیكی رۆژنامەوانی و بەشێوەیەكی نابەرپرسانە، بەشێك لە قسەكانی هونەرمەند مستەفا ئەحمەدی جێگۆڕكێ پێكردووە كە پێچەوانەی ناوەڕۆك و قسەكانی هونەرمەند دەگەیەنێت”.
ئاماژەی بۆ ئەوەش كردووە، ئەمجۆرە مامەڵەكردنە لەگەڵ دیدار و قسەی كاراكتەرێكی دیاری هونەریی، پێشینەیەكی ناپیشەیی و نامۆڕاڵییە و جگەلە بە ئامانجگرتنی سەرۆك مام جەلال، بەكارهێنانی هونەرمەندێكیشە بۆ بازاڕسازی لایك و كۆمێنت كە نەك هەركارێكی پەسەندكراو نییە، بەڵكو پێچەوانەی سەنگ و كاركردنی پێشووتریانە.
ئەوەشخراوەتەڕوو، هیوادارین ئەمە هەڵەیەكی تەكنیكی بێت و بەسەریاندا رەتبووبێت نەك بەدەستی ئەنقەست روویدابێت.
