قوباد تاڵەبانی، جێگری سەرۆک وەزیرانی هەرێمی کوردستان لە یادی کارەساتی یەکی شوباتدا، پەیامێکی بڵاوکردەوە و رایدەگەیەنێت، “لە یەکی شوباتی 2004دا خوێنی شەهیدەکانمان یەکڕەنگ بوون”.
ئاماژەی بەوەشدا، “تیرۆریستان و خۆکوژان جیاوازییان لەنێوان خوێنی هاوڵاتییەکی مەدەنی و خوێنی کادر و سەرکردەیەکی یەکێتی و خوێنی کادر و سەرکردەیەکی پارتی نەکرد”.
لە کۆتایی پەیامەکەیدا، قوباد تاڵەبانی نووسیویەتی، “یەکی شوبات بۆ هەمیشە وەک سیمبولی هاوچارەنووسی و یەکڕەنگیمان لە یادەوەریی مێژووییماندا دەمێنێتەوە”.
ئەمڕۆ 21 ساڵ بەسەر رووداوی هەردوو تەقینەوەکەی بارەگای مەڵبەندی سێی یەکێتیی نیشتمانیی کوردستان و لقی دووی پارتی دیموکراتی کوردستان تێدەپەڕێت، کە بەهۆیەوە 103 کەس شەهیدبوون و زیاتر لە 240 کەسی دیکەش برینداربوون.
