هەڵگرانی بڕوانامە باڵاكان لە هەولێر گردبوونەوەی ناڕەزاییان ئەنجامدا و داوای دامەزراندن دەكەن.
لە گردبوونەوەكەدا راگەیەندراوی هەڵگرانی بڕوانامە باڵاكان خوێندرایەوە و تیایدا هاتووە، بە نوێنەرایەتی سەرجەم هەڵگرانی بڕوانامەكانی (ماستەر و دكتۆرا)ی دانەمەزراو لە هەرێمی كوردستاندا داواكارییان بۆ سەرۆكایەتیی ئەنجومەنی وەزیران و وەزارەتی خوێندنی باڵا و توێژینەوەی زانستی ئەوەیە كە بەپێی یاسای ژمارە (59)ی ساڵی 2017ی حكومەتی ناوەندی و ئەنجومەنی نوێنەران، ماف دراوە بە خاوەن بڕوانامە باڵاكان بۆ دامەزراندنیان.
هەڵگرانی بڕوانامە باڵاكان وەك خۆیان دەڵێن ژمارەیان نزیكەی 500 كەس دەبێت، روونیدەكەنەوە، حكومەتی هەرێم پشتبەست بە هەمان بڕیاری ساڵی 2017 و بڕیاری خۆی ژمارە 170 داوایكردووە ئەنجومەنی راژەی هەرێم لەگەڵ وەزارەتی دارایی عێراق تایبەت بە دامەزراندنی ئەوان و سێ یەكەمەكان كۆببێتەوە، بەڵام دوای دوو ساڵ بەسەر ئەو بڕیارەدا هێشتا هیچ هەنگاوێكی لێپرسراوانە و كرداری لەلایەن ئەنجومەنی وەزیران و وەزارەتی خوێندنی باڵاوە نەنراوە.
لە راگەیەندراوەكەدا داواكرا، هەلی دامەزراندنیان “بەبێ جیاوازی” بۆ بڕەخسێندرێت و، كاری پێویستی لەسەر بكرێت پێش پەسەندكردنی خشتەی بودجەی ئەمساڵ.
