وەزارەتی پێشمەرگە راگەیەندراوێكی لەبارەی خانەنشینبوونی ئەفسەران و كارمەندانی وەزارەتەكە بڵاوكردەوە.
بەپێی راگەیەندراوێكی وەزارەتی پێشمەرگە كە وێنەیەكی دەست تۆڕی میدیایی ئێستا كەوتووە و تێیدا هاتووە، بە پشتبەستن بە بڕیارەكانی وەزارەتی دارایی و ئابوریی هەرێم، فەرمانێكی وەزاریی بۆ سەرجەم بەڕێوەبەرایەتی و یەكە سەربازییەكان دەركردووە و بە پێی فەرمانەكە، ئەو ئەفسەر و كارمەندانەیان خانەنشین دەبن، كە یاسای راژە و خانەنشینیی سەربازی ژمارە (3)ی ساڵی 2010 دەیانگرێتەوە.
ئاماژە بۆ ئەوەش كراوە، لەبەر ڕۆشنایی بڕیاری ئەنجومەنی وەزیران ژمارە(259) پشتبەست بە بڕیاری دادگای باڵای فیدراڵیی ژمارە(212 اتحادییە/2022) لە 23/11/2022 تایبەت بە جێبەجێكردنی یاسای خانەنشینیی یەكگرتوو، ژمارە (9) ساڵی 2014ی هەمواركراو، ئاماژە بە راپۆرتی تیمی هاوبەشی وردبینیی هەردوو دیوانی چاودێریی دارایی عێراق و هەرێم لە رۆژی 17/10/2023 تایبەت بە ئەنجامی چاودێری و وردبینیی ژمارەی فەرمانبەران و خانەنشین و سوودمەندانی چاودێریی كۆمەڵایەتی لە هەرێم”.
لە راگەیەندراوەكەدا ئەوەش هاتووە، “وەزارەتی پێشمەرگە پشتبەست بە بڕیارەكانی وەزارەتی دارایی و ئابوری ئەم فەرمانە وەزارییەی بۆ سەرجەم بەڕێوەبەرایەتی و یەكە سەربازییەكان بڵاوكردووەتەوە و بە پێی فەرمانەكە ئەفسەران و كارمەندانی وەزارەتی پێشمەرگە كە ئێستا خانەنشین دەبن بە پێی یاسای راژە و خانەنشینیی سەربازی ژمارە(3)ی ساڵی 2010 خانەنشین دەكرێن، كە پاڵپشتە بە ماددەی(35) لە بڕگەی (سێیەم/ب) لە یاسای خانەنشینیی یەكگرتوو ژمارە(9) ساڵی 2014”.
حكومەتی هەرێم بڕیاریدا تەمەنی خانەنشینی لە 63 ساڵییەوە كەمبكاتەوە بۆ 60 ساڵی كە ئەمەش وادەكات ژمارەیەكی زۆر لە فەرمانبەران و مامۆستایان لە دەزگا و دامەزراوە و ناوەندە حكومییەكان خانەنشین بكرێن.
