ئەمڕۆ شەممە، حەماس چوار سەربازی ژنی ناو سوپای ئیسرائیلی بە ناوەکانی دانیێلا گیلبۆوا، نەعمە لیڤی، کارینا ئاریڤ و لیری ئێلباگ، رادەستی خاچی سووری نێودەوڵەتی کرد.
پرۆسەی رادەستکردنی ئەو چوار بارمتە ئیسرائیلییە بە تیمەکانی خاچی سووری نێودەوڵەتی، لە ئامادەبوونێکی جەماوەریدا لە گۆڕەپانی فەڵەستین-ی غەززە ئەنجامدرا.
وەک لە ڤیدیۆی ساتی ئازادکردنەکەیان دەردەکەوێت؛ هەریەک لە بارمتەکان بە ئۆتۆمبێلێکی خاچی سوور لە گۆڕەپانەکە هەڵدەگیرێن و لەکاتی هەڵگرتنیشیاندا، ئەندامێکی حەماس و نوێنەرێکی خاچی سووری نێودەوڵەتی، بەڵگەنامەکانی رادەستکردنی بارمتەکە واژوو دەکەن.
