ئەمڕۆ شەممە، کۆبوونەوەیەکی جیاواز و نائاسایی لە ئەنجومەنی وەزیرانی هەرێمی کوردستان بەڕێوەدەچێت، بۆ کۆبوونەوەکە بانگهێشتی نوێنەرانی هەرێمی کوردستان لە حکومەتی فیدڕاڵی و سەرۆکی فراکسیۆنە کوردستانییەکانی سەرجەم لایەنەکانی ئەنجومەنی نوێنەرانی عێراق کراوە.
پێشەوا هەوارامانی، وتەبێژی حکومەتی هەرێمی کوردستان رایگەیاند، کۆبوونەوەکە لە کاتژمێر 10:00ی بەیانیدا بەڕێوەدەچێت لە ئەنجومەنی وەزیران.
لەبارەی بابەتی کۆبونەوەکەوە رایگەیاند، تایبەت دەبێت بە پرسی مووچە و شایستە داراییەکانی هەرێمی کوردستان لە حکومەتی فیدراڵی عێراق.
بەگوێرەی زانیارییەکان، سەرەڕای بانگهێشتکردنی سەرجەم سەرۆکی فراکسیۆنە کوردییەکانی ئەنجوومەنی نوێنەرانی عێراق، بەڵام یەکگرتووی ئیسلامی و کۆمەڵی دادگەری رایانگەیاند، بەشداریی دانیشتنەکە ناکەن.
کێشەی مووچەی نێوان هەرێم و بەغداد، کێشەیەکی لەمێژینە و دوورو درێژە، کە بە نزیکەیی 10 ساڵە بەردەوامە و هاوڵاتییانی هەرێمی کوردستان هیواخوازن مەینەتییەکانی ژیانیان بەهۆی کێشەی دواکەوتنی مووچە و دابەشنەکردنی مووچەوە چارەسەرببێت، کە کاریگەریی لەسەر بازاڕ و گوزەرانیان هەبووە.
