وتەبێژی بەرگریی شارستانیی هەرێم رایگەیاند، “ساڵی رابردوو 594 ئۆتۆمبێل سووتاون”.
سەرکەوت کاڕەش، وتەبێژی بەرگریی شارستانیی هەرێم لە کۆنفرانسێکی رۆژنامەوانیدا رایگەیاند، ساڵی رابردوو لە هەرێمی کوردستان نۆ هەزار و 904 رووداوی جۆراوجۆر روویانداوە.
باسی لەوەشکرد، لە هەمان ساڵدا 48 کەس بە رووداوە جیاجیاکان لە تەواوی هەرێمی کوردستان گیانیان لەدەستداوە، و 94 هاوڵاتیش لە ئاودا خنکاون کە زۆرینەیان تەمەنیان لەنێوان 15 بۆ 25 ساڵ بووە، هەروەها لە سەرجەم رووداوەکاندا توانراوە 478 هاوڵاتی لە مردن رزگاربکرێن.
ئەوەشی وت، هەر لەو ساڵەدا چوار هەزار و 755 رووداوی سوتانی پوش و پاوانی ناوچەکانی هەرێم هەبوون کە بەهۆیانەوە پانتاییەکی زۆری سروشتی کوردستان ئاگریگرتووە.
سەرکەوت کاڕەش، باسی لەوەش کرد، هەر لە ساڵی رابردوودا 594 ئۆتۆمبێل لەسەرجەم پارێزگا و ئیدارە سەربەخۆکاندا بە هۆکاری جیاواز سووتاون.
