لێپرسراوی مەکتەبی سکرتارییەتی سەرۆک مام جەلال و بەرپرسی بازنەی راپەڕین لە هەڵبژاردنی پەرلەمانی کوردستان، لە رانییە لەگەڵ بەرپرسی بازنەکان و تیمەکانی کەمپینی بانگەشەی هەڵبژاردنی یەکێتی لە ئیدارەی راپەڕین کۆبووەوە و رایگەیاند، یەکێتی چاوی لە سەرکەوتنێکی گەورەترە.
لە کۆبوونەوەکەدا کە ئەمڕۆ بەڕێوەچووو، قوباد تاڵەبانی، لێپرسراوی مەکتەبی سکرتارییەتی سەرۆک مام جەلال سوپاسی دانیشتووانی دەڤەری راپەڕین و ئەندامانی کەمپینی بانگەشەی هەڵبژاردنی یەکێتیی نیشتمانیی كوردستان و کادیران و جەماوەری یەکێتی لە سنوورەکە کرد بۆ ئەو سەرکەوتنە گەورەیەی لە هەڵبژاردندا تۆماریان کرد و جارێکیتر دەڤەری راپەڕینیان سەوزپۆش کردەوە.
راشیگەیاند، دانیشتوانی بە شەرەفی دەڤەری راپەڕین بەم پشتگیرییە گەورەیان لە یەکێتی، سەری یەکێتییان بەرزکردەوە و جارێکی دیکە یەکێتییان قەرزاری خۆیان کردەوە. وتیشی، “هەرگیز جارێکی دیکە یەکێتی کەمتەرخەم نابێت بەرامبەر جەماوەرە دڵسۆزەکەی و خواست و ئیرادەی جەماوەری یەکێتی هەمان خواست و سیاسەتی یەکێتی دەبێت”.
لە بەشێکی دیکەی کۆبوونەوەکەدا، قوباد تاڵەبانی دانیشتووانی دەڤەری راپەڕینی دڵنیاکردەوە و رایگەیاند، وەکچۆن ئێوە لە دەنگداندا راستگۆ و بەوەفا بوون بەرامبەرمان، یەکێتیش لە دوای هەڵبژاردن راستگۆ و بەوەفا دەبێت لەگەڵتان و کارێك ناکەین رۆژێک لە رۆژان لە دەنگدان و پشتگیریکردنی یەکێتی پەشیمان ببنەوە.
لێپرسراوی مەکتەبی سکرتارییەتی سەرۆک مام جەلال، داوای لە ئەندامانی کەمپینی بانگەشەی هەڵبژاردنی یەکێتی کرد کە ساردنەبنەوە و لە ئێستاوە خۆتان ئامادەبکەن بۆ هەڵبژاردنەکانی خولی داهاتووی ئەنجومەنی نوێنەرانی عێراق، چونکە یەکێتی چاوی لە سەرکەوتنێکی گەورەترە.
