غەریب ئەحمەد، ئەندامی ئەنجومەنی نوێنەرانی عێراق رایگەیاند، چەند رۆژێكە قسە و باسی پێدانی تاقیگە حكومییەکان بە کەرتی تایبەت دەكرێت بۆ ماوەی 10 ساڵ لەلایەن وەزارەتی تەندروستییەوە و دەشڵێت، “لە ئەگەری دڵنیابوون لە بەرکاربوونی ئەم کارە لە دادگای باڵای عێراق سکاڵامان دەبێت”.
غەریب ئەحمەد، ئەندامی ئەنجومەنی نوێنەرانی عێراق بە تۆڕی میدیایی ئێستای راگەیاند، حكومەتی هەرێم لەبری دۆزینەوەی چارەسەر بۆ مووچە و كەشێكی گونجاو بۆ بازاڕ، زیاتر سەرشانی هاوڵاتییانمان قورس دەكات.
ئاماژەی بەوەشکرد، پاڵپشت بە مادەی (61/دووەم) و مادەی (31/یەکەم)ی دەستوور، و لە ئەگەری دڵنیابوون لە بەركاربونی ئەم كارە نا تەندروستی و نادەستووریە و دڵنیابوونمان لە زیان و زیادكردنی نرخ لەسەر هاوڵاتییان، لە دادگای باڵای عێراق تانەمان دەبێت لەم بڕیارەی وەزارەتی تەندروستی.
ناوبراو وتیشی، “ئەم بڕیارە جگە لە خراپكاری و قۆرغكاری دژ بە هاوڵاتیانی، هاوكات زیانی تەواویش بەر كەرتی تەندروستی دەگەێنێت لە رووی تەندروستیی تاقیگەكان و بارگرانی مادیش لەسەر هاوڵاتییانی هەرێم دروست دەكات.
داواشی لە وەزیری تەندروستی کرد، خۆیان وەك وەزارەتێكی حكومی بە باشتر لە رابردوو ئیدارەی تەندروستی ئەم تاقیگانە بدەن و واژۆی گرێبەستنامەكەیان لەگەڵ كۆمپانیای کەس بکشێننەوە، ئەمە بۆ خۆشیان و هاوڵاتییانیش باشتر دەبێت.
