دابەشکردنی بەنزینی حکومی بە نرخی 750 دینار لە سلێمانی بەردەوامە.
ماوەی سێ رۆژە دابەشکردنی بەنزینی حکومی لە شەش بەنزینخانەی سلێمانی دەستیپێکردووە کە بریتین لە بەنزینخانەکانی (کۆکار، هەڵەبجە، پێشەوا، دایک، کازیوە و تاسڵوجە)، بۆ هەر بەنزینخانەیەک رۆژانە بڕی 36 هەزار لیتر بەنزین دابیندەکرێت.
ئەو بەنزینەی دابەشدەکرێت لە جۆری نۆرماڵە و لیترێک بە 750 دینار بە هاوڵاتی و شۆفێران دەدرێت.
دابەشکردنی ئەو بەنزینە بووەتە هۆی هەرزانبوونی نرخی بەنزینی بازرگانی بە جۆرێک بۆ هەرسێ جۆری نۆرماڵ، موحەسەن و سۆپەر 25 دینار دابەزیوە.
ئێستا نرخی بەنزینی نۆرماڵ لە 950 دینارەوە بووە بە 925 دینار و موحەسەن لە هەزار و 150 دینارەوە بووە بە هەزار و 125 دینار و سۆپەریش لە هەزار و 300 دینارەوە بووە بە هەزار و 275 دینار.
