سەرۆکایەتیی دیوانی پەرلەمان بانگهێشتکردنی پەرلەمانتاران لەلایەن سەرۆکی کاتی پەرلەمانەوە بۆ کۆبوونەوە رەتدەکاتەوە و جەختدەکاتەوە ئەو پرۆسەیە رێکاری تایبەت بە خۆی هەیە.
ئەردەڵان محەمەد سەرۆکی دیوانی پەرلەمانی کوردستان لە راگەیەندراوێکدا بڵاویکردەوە، بانگهێشت و دانانی بەرنامەی کاری دانیشتنەکانی پەرلەمان، رێکار و پەیرەوی خۆی هەیە و بە سەرۆکایەتیی دیوانی پەرلەماندا تێدەپەڕێت، ناکرێت ئەو رێوشوێنانە وەک خۆیان جێبەجێ نەکرێن.
ئاماژەی بەوەشکرد، ئەگەر بانگهێشت و بەرنامەی کار هەبێت لە لایەن سەرۆکایەتیی دیوان بڵاو دەکرێتەوە لە سایتی رەسمی پەرلەمان، لە دەرەوەی ئەو رێوشوێنانە هەر هەوڵێکی دیکە هیچ لێکەوتەی یاسایی و پەیرەوی لێناکەوێتەوە.
ئەمە لە کاتێکدایە چەند کاتژمێرێک لەمەوبەر محەمەد سڵێمانی سەرۆکی کاتی پەرلەمان داوای لە پەرلەمانتاران کرد بۆ کۆبوونەوەی رۆژی سێشەممە ئامادەبن و دەستەی سەرۆکایەتیی پەرلەمان هەڵبژێرن.
