ئەندامێكی ئەنجومەنی نوێنەرانی عێراق رایدەگەیەنێت، لەگەڵ حكومەتی عێراق قسە كراوە كە كورتهێنانی مووچەی مانگی 10 پڕبكاتەوە و چاوەڕواندەكرێت لەم چەند رۆژەدا ئەو گرفتە چارەسەربكرێت.
سەباح حەبیب، ئەندامی ئەنجومەنی نوێنەرانی عێراق لە لێدوانێكدابە تۆڕی میدیایی ئێستای راگەیاند، هەرێم لە گفتوگۆدایە لەگەڵ بەغداد كە كورتهێنانی مووچەی مانگی 10ی پڕبكاتەوە و گرفتەكە لەوەدایە كە ناتوانرێت مناقلە لە پشكی هەرێمی كوردستاندا بكرێت.
وتیشی، “ئەو بڕە پارەیەی بۆ كورتهێناكە داواكراوە بۆ حكومەتی عێراق زۆر نییە و بەپێی زانیارییەكان لەم چەند رۆژەدا كورتهێنانی مووچەی مانگی 10 لەلایەن بەغداوە پڕدەكرێتەوە”.
جێی ئاماژە بۆ كردنە، پێشتر راگەیەندرا كە بەغداد 760 ملیار دینار بۆ مووچەی مانگی 10ی مووچەخۆرانی هەرێم دەنێرێت و بەوەش كورتهێنان دروستدەبێت و هەرێم بۆ مووچە پێویستی بە 996 ملیار دینارە.
