بڕیارە ئەمڕۆ یەکەم دانیشتنی خولی شەشەمی پەرلەمانی کوردستان بەڕێوەبچێت.
بە پێی راگەیەندراوی رەسمیی پەرلەمانی هەرێمی کوردستان، دانیشتنەکە ئەمڕۆ دووشەممە، کاتژمێر 11ی پێشنیوەڕۆ بەڕێوەدەچێت، دەستپێکی دانیشتنەکە بە چەند ئایەتێکی قورئانی پیرۆز دەبێت.
هەر بەپێی راگەیەندراوەکە، دواتر خولەکێک بێدەنگ وەستان بۆ رێزلێنان لە گیانی شەهیدانی کوردستان ئەنجامدەدرێت و بانگهێشتی بەتەمەنترین کاندیدی ئامادەبوو دەکرێت، لە پاڵێوراوانی سەرکەوتووی خولی شەشەمی هەڵبژاردنی پەرلەمان بۆ سوێندخواردن و بەڕێوەبردنی دانیشتنەکە.
سەرۆکی یەکەم دانیشتنی خولی شەشەم، کاندیدە هەڵبژێردراوەکان بۆ خولی شەشەمی پەرلەمانی کوردستان بانگدەکات بۆ سوێندخواردنی یاسایی و پاشان دانیشتنەکە بەڕێوەدەچێت.
