لە رێوڕەسمێكدا دیاریی سەرۆكی یەكێتی بەسەر کەسوکاری شەهیدانی 16ی ئۆکتۆبەردا بەخشرا.
ئەمڕۆ سێشەممە، بافڵ جەلال تاڵەبانی، سەرۆکی یەکێتیی نیشتیمانیی کوردستان، لەڕێگەی مەکتەبی شەهیدان و تێکۆشەرانەوە، دیاری بەخشییە کەسوکاری شەهیدانی 16ی ئۆکتۆبەر.
بڵێسە جەبار فەرمان، لێپرسراوی مەکتەبی شەهیدان و تێکۆشەران، لە لێدوانێکیدا بۆ تۆڕی میدیایی ئێستا رایگەیاند، وەک چۆن لە پێشووتردا بەڵێنمان بە کەسوکاری شەهیدان داوە کە لەخزمەتیاندا بین، بەردەوام لەهەوڵی ئەوەداین خزمەتیان بکەین، بەتایبەت دوای کۆنگرەی پێنجەم.
وتیشی، “هەرچەندە بڕوامانوایە کە خزمەتی زیاتری کەسوکاری شەهیدان لەڕێگەی یاسا و پەرلەمان و حکومەتەوە دەکرێت، بەڵام وەک مەکتەبی شەهیدان ئەوەی لە تواناماندا بێت کەمتەرخەم نابین و هەرجارە و دیاری بە کۆمەڵێک لە کەسوکاری شەهیدان دەبەخشین”.
