دوای دابەزینەكانی هەفتەی ڕابردوو، بەهای نەوتی خاو لە جیهاندا دابەزینی زیاتری بەخۆیەوە بینی و ئەمڕۆ خاوی برێنت نرخەكەی گەیشتە خوار 55 دۆلار.
ئەمڕۆ دووشەممە 18ی كانونی دووەم، لەكاتی بڵاوكردنەوەی ئەم هەواڵەدا نرخی یەك بەرمیل نەوتی خاوی برێنت بەرامبەرە بە 54 دۆلار و 73 سەنت، بەوەش تەنها لەمڕۆدا 0.67%ی بەهاكەی لەدەستداوە.
هەروەها بەهای نەوتی خاوی تێكساسی دابەزینی بەخۆیەوە بینیوە و نرخی یەك بەرمیلی بەرامبەرە بە 52 دۆلار و 08 سەنت.
پێنجشەممەی ڕابردوو نرخی یەك بەرمیل نەوتی خاوی برێنت بەرامبەر بوو بە 55 دۆلار و 90 سەنت و، خاوی تێكساس-یش نرخی یەك بەرمیلی بەرامبەر بوو بە 52 دۆلار و 88 سەنت.
دابەزینی جارێكی دیكەی نەوت پەیوەندی بە بەردەوامی بڵاوبوونەوەی ڤایرۆسی كۆرۆنا و كاریگەرییەكانی جۆرە نوێیەكەی ڤایرۆسەكەوە هەیە، بە تایبەت لە وڵاتانی ئەوروپا.
