یانەی ئەتلەتیک بلباو ڕوبەڕوبوونەوەی کۆتایی جامی سوپەری ئیسپانیای بەرانبەر بەرشلۆنە ئەنجامدا و بردنەوەی تۆمارکرد.
ئەمشەو، یەکشەممە یاری کۆتایی جامی سوپەری ئیسپانیا لە نێوان یانەکانی بەرشلۆنە و ئەتلەتیک بلباو ئەنجامدرا، یانە باسکییە سەرسەختەکەی ئیسپانیا بە ئەنجامی سێ گۆڵ بەرانبەر بە دوو بردنەوەی تۆمارکرد.
تایمی یەکەم یانەی بەرشلۆنە ئاستێکی باشی پێشکەشکرد و دوای فشارێکی توند لە خولەکی 40 گۆڵی پێشەنگی تۆمارکرد، گۆڵەکەش لەلایەن ئەنتوان گریزمانەوە تۆمارکرا، بەڵام کاردانەوەی باسکییەکان خێرا و کاریگەربوو و لە خولەکی 42 ئۆسکار دی مارکۆس گۆڵی یەکسانکەرەوەی ئەنجامەکەی تۆمارکرد و ئەو تایمەش بە ئەنجامی یەکسانبوون (1-1) کۆتاییهات.
لە تایمی دووەمدا ئەتلەتیک بلباو چەندین هێرشی مەترسیداری ڕەخساند، بەڵام سەرکەوتوو نەبوون لە تۆمارکردنی گۆڵ.
لە خولەکی 77 ئەنتوان گریزمان گەڕایەوە و گۆڵی دووەمی بارسا و پێشەنگی تۆمارکرد، دووبارە بلباو لە کۆتا ساتەکاندا گەڕایەوە و لە خولەکی 91 ئاسیر ڤیلالیبری گۆڵی یەکسانکەرەوەی تۆمارکرد و کاتی یاسایی بە ئەنجامی (2-2) کۆتاییهات.
https://streamable.com/08fkt3
بە ناچارییەوە پەنا بۆ کاتی زیادکراو برا، لە خولەکی 94 ئیناکی ویلیامز بە لێدانێکی هونەری ناوازە گۆڵی سێیەم و پێشەنگی بۆ ئەتلەتیک بلباو تۆمارکرد و توانیان تاوەکو کۆتا سات بە سەرکەوتووی پارێزگاری لە گۆڵەکەیان بکەن، یارییەکە بە ئەنجامی سێ گۆڵ بەرانبەر بە دوو لە بەرژەوەندی ڕۆخی بلانکۆسی باسک کۆتاییهات و بۆ جاری سێیەم لە مێژوویاندا جامی سوپەری ئیسپانیایان بەرزکردەوە.
یەکێک لە خاڵە گرنگەکانی ڕوبەڕوبوونەوەکە ئەوەبوو، لە خولەکەکانی کۆتاییدا لیۆ مێسی لەلایەن جیل مانزانۆی داوەرەوە بە کارتی سوور لە یاریگا کرایە دەرەوە.
