چەند زیندانییەك ئاگریان لە بەشی گرتن و گواستنەوەی سەر بە پۆلیسی گەرمیان بەردا، ئەوەش پاش ئەوە دێت كە بەشێك لە زیندانییەكان لە بەیانی ئەمڕۆوە مانگرتنیان ڕاگەیاندووە.
بەگوێرەی ئەو زانیارییانەی دەست تۆڕی میدیایی ئێستا كەوتوون، بەیانی ئەمڕۆ یەكشەممە 17ی كانونی یەكەم، ژمارەیەك كەس لە زیندانییانی گرتن و گواستنەوەی گەرمیان لە كەلار، مانیان گرتووە و ڕایانگەیاندووە، “جیاوازی دەكرێت لەنێوان زیندانییەكاندا و دادپەروەرانە مامەڵەیان لەگەڵدا ناكرێت”.
پاش ئەو مانگرتن و ناڕەزایەتییانە، ئێوارەی ئەمڕۆ بەشێكی زیندانییەكان ئاگریان لە بینای گرتن و گواستنەوەی گەرمیان بەرداوە.
بەهۆی ئەو ڕوداوەوە، دوو كارمەندی شوێنەكە دووچاری تەنگەنەفەسی بوونەتەوە و زیانی گیانی بەدواوە نەبووە و لە ئێستادا ئاگرەكە كۆنتڕۆڵكراوە.
تۆڕی میدیایی ئێستا پەیوەندی بە عەلی قەدوری، وتەبێژی پۆلیسی گەرمیانەوە كرد و ناوبراو ئامادە نەبوو هیچ لێدوانێك لەو بارەیەوە بدات.
