بەڕێوەبەری چاودێریی كۆمەڵایەتیی سلێمانی دەڵێت، پێش هاتنی وەرزی سەرما جلوبەرگ و پێداویستییەكانیان بۆ خانەكانی منداڵان و ماڵی بەساڵاچووان دابینكردووە.
ژیار جەلال، بەڕێوەبەری چاودێریی كۆمەڵایەتیی سلێمانی بە تۆڕی میدیایی ئێستای راگەیاند، دۆخی خانەكانی منداڵان، نەوجەوانان و ماڵی بەساڵاچووان زۆر باشە و هیچ كێشەیەكیان نییە.
وتیشی، “بەپێی ئەو نەسریەی هەمانە و ئەو هاوكارییەش كە لە ماوەی رابردوودا بەدەستمان گەیشت و، رێكخراوەكانیش بەردەوام هاوكاریمان دەكەن، لەئێستادا هیچ كێشە و كەموكوڕییەكمان نییە”.
منداڵان لە قوتابخانەن، لەئێستادا نەوت هەیە، جلوبەرگ هەیە و هیچ كێشەیەك نییە، ژیار جەلال وای وت.
ئەوەشی خستەڕوو، پێش وەرزی زستان هەموو پێداویستییەكانی وەرزی سەرمامان ئامادەكردووە و هەر كاتێك كێشە و كەموكوڕیمان هەبێت، راستەوخۆ رایدەگەیەنین.
لە كۆتایی مانگی ئازاری رابردوو هەڵمەتێکی کۆکردنەوەی هاوکاری بۆ خانەکانی نەوجەوانان و بەساڵاچووانی سلێمانی بەڕێوەچوو.
دوای كۆكردنەوەیان بەڕێوەبەری چاودێریی كۆمەڵایەتیی سلێمانی ئەوكات رایگەیاند، هاوکارییەکان شتومەک و پێداویستیی رۆژانە بوون بۆ بەساڵاچووان و نەوجەوانان، کە سەرجەمیان لە رێگای چەند لیژنەیەکەوە بەسەر خانەکاندا دابەشکران.
