لە سلێمانی دژی گرانی نرخی بەنزین شۆفێرانی تاكسی گردبوونەوە و شەقامی سلێمانی- تاسڵوجەیان داخستووە.
ماوەی زیاتر لە كاتژمێرێكە شۆفێرانی تاكسی لەنێو شاری سلێمانی لەبەردەم بینای ئەنجومەنی پارێزگا، لەدژی گرانبوونی زیاتری نرخی بەنزین گردبوونەتەوە و شەقامی سەرەكی هاتن و چوونی سلێمانی- تاسڵوجەیان داخستووە.
بە وتەی پەیامنێری ئێستا لەنێو گردبوونەوەكەدا جگە لە شۆفێرانی تەكسی هاوڵاتییانیش بەشدارن و دەڵێن “گرانی نرخی بەنزین كاریگەرییەكی زۆری لەسەر بژێوی ژیانیان هەیە”.
ئەوەش لەكاتێكدایە، نرخی یەك لیتر بەنزینی نۆرماڵ لە بەنزینخانە ئەهلییەكان هەزار و 25 دینارە، هاوكات بەنزینە 690 دینارییەكەی عێراقیش لە چەند بەنزینخانەیەك ڕۆژانە دابەشدەكرێت، بەڵام وەكو شۆفێران دەڵێن بەهۆی قەرەبالغی زۆرەوە ماوەیەكی زۆریان پێدەچێت تا بەنزینیان پێدەدرێت.
