سەرۆك وەزیرانی عێراق و سەرۆكی سوریا لە ریاز چەند پرسێكیان تاوتوێكرد.
محەمەد شیاع سودانی، سەرۆك وەزیرانی عێراق ئەمڕۆ لە ریاز-ی پایتەختی سعودیە لەگەڵ بەشار ئەسەد، سەرۆكی سوریا كۆبووەوە، لە پەراوێزی بەشداریكردنیان لە لوتكەی هاوبەشی عەرەبی و ئیسلامی تایبەت بە ململانێكانی ناوچەكە.
بەپێی راگەیەندراوێكی نووسینگەی سودانی، پەیوەندییە دووقۆڵییەكانی نێوان هەردوو وڵات و چۆنیەتی پەرەپێدان و بەرەوپێشەوەبردنی لە بوارە جیاجیاكاندا، بەجۆرێك بەرژەوەندییە هاوبەشەكان بهێنێتەدی، تاوتوێكراون.
هەردوولاش جەختیان كردەوە لەسەر هەماهەنگیی هەڵوێست و بڕیارەكان لەمیانی لوتكەدا لەپێناو وەستانی شەڕ و، پێویستیی لەئەستۆگرتنی بەرپرسیارێتی لەلایەن وڵاتە گەورە و رێكخراوە نێودەوڵەتییەكان بۆ راوەستاندنی دەستدرێژی بۆ سەر هاوڵاتییانی مەدەنی، وەك ئەوەی لە راگەیەندراوی نووسینگەكەدا هاتووە.
