پەرلەمانتارێكی چێوەی هەماهەنگیی شیعەكان دەڵێت، لێكنزیكبوونەوەی سیاسی لەنێوان ئەوان و ڕەوتی سەدردا هاتووەئاراوە و تەنها چەند هەنگاوێكیان ماوە بۆئەوەی گەورەترین هاوپەیمانی ڕابگەیەنن و حكومەت پێكبهێنن.
محەمەد بەلداوی ئەندامی ئەنجومەنی نوێنەران لە پشكی لایەنەكانی ناو چێوەی هەماهەنگی ڕایگەیاند، “لە گفتوگۆ و وتووێژی ڕۆژانەدا، چێوەی هەماهەنگی و ڕەوتی سەدر تا ڕادەیەكی باش لە یەكتر نزیكبوونەتەوە و تەنها چەند هەنگاوێكیان ماوە بۆ ڕاگەیاندنی ڕێككەوتنی گشتگیر و پێكهێنانی حكومەتێكی نیشتمانی”.
بە وتەی بەلداوی، “بڕیارەكانی ئەمدواییەی دادگای فیدراڵی لەبارەی سەرۆكایەتیی كۆمار و دەنگدان بە كاندیدی پۆستەكە و نەوتی كوردستان و دوورخستنەوەی هۆشیار زێباری، كاریگەرییان هەبوو لەسەر جیاوازیی بۆچوونە سیاسییەكانی هەموو لایەنەكان”.
وتیشی، “باشترین ڕێگەچارە، ڕاگەیاندنی بەرەیەكی سیاسیی گەورەیە كە زۆرینەی هێزە سیاسییەكان لەخۆبگرێت و سەرۆك كۆمار و سەرۆك وەزیران و وەزیرەكان دەستنیشانبكرێن بەبێ ئاڵۆزكردنی دۆخەكە و بەپێی شایستەیی هەر لایەنێك”.
