هەفتەی رابردوو کچێک لە یەکێک لە پرۆژە نیشتەجێبوونەکانی شاری هەولێر کەوتەخوارەوە و گیانیلەدەستدا، باوکیشی دەڵێت، هاوسەرەکەی کوشتوویەتی و دواتر سێ کچ و کوڕێکی دیکەشی رفاندووە.
پێشنیوەڕۆی ئەمڕۆ لەبەردەم دادگای هەولێر، ژن و پیاوێک بە چاوی پڕ فرمێسکەوە دەرکەوتن و رایانگەیاند، “هەفتەی رابردوو زاواکەمان کچەکەمانی لە شوقەیەکی نیشتەجێبوونەوە خستووەتە خوارەوە لەدوای ئەوەش سێ کچ و کوڕێکی دیکەمانی بۆ شوێنێکی نادیار رفاندووە”.
باوکەکە باسیلەوەکرد، کەسێک بە رۆژی رووناک کچەکەمی بەزۆر و بێ رەزامەندی لێسەندین و بردی دواتریش لە شوقەیەکی نیشتەجێبوون خستییە خوارەوە و گیانیلەدەستدا، ئێستا سکاڵامان تۆمارکردووە سکاڵاکەشمان لێوەرناگرن.
وتیشی، پۆلیس بە ئێمەی وت لە ماڵی خۆتاندا بمێننەوە و هیچ مەکەن، بەڵام دواتر ئەو هات و منداڵەکانی رفاندین و ئێستا نازانین لە کوێن.
باسیلەوەشکرد، چوار جار سکاڵام لە دژی ئەو کابرایە تۆمارکردووە، سێ هەزار دۆلارم خەرجکردووە، کەس وەڵامم ناداتەوە.
